జనాభాలో అగ్రస్థానం.. భారత్‌కు వరం.. చైనాకు కలవరం.. ఎలాగంటే?
ప్రపంచంలో అత్యధిక జనాభా గల దేశంగా చైనా స్థానాన్ని భారత్ ఆక్రమించిన సంగతి తెలిసిందే. ప్రస్తుతం చైనా జనాభా 142 కోట్ల 57 లక్షలు ఉండగా.. భారత జనాభా 142 కోట్ల 86 లక్షలుగా ఉందని ఏప్రిల్ 19న ఐక్యరాజ్య సమితి ప్రకటించింది. 34 కోట్ల జనాభాతో అమెరికా ప్రపంచంలో మూడో స్థానంలో ఉందని ఐరాస ప్రకటించింది. గత ఏడాది నుంచి చైనా జనాభా తగ్గుదల మొదలు కాగా.. ఎప్పటిలాగే భారత జనాభా పెరుగుతుండటంతో.. మన దేశం డ్రాగన్‌ను వెనక్కి నెట్టి జనాభా విషయంలో మొదటి స్థానానికి చేరుకుంది. వన్ చైల్డ్ పాలసీని వెనక్కి తీసుకున్నప్పటికీ.. పిల్లలను కంటే ప్రోత్సాహకాలు ప్రకటిస్తున్నప్పటికీ.. చైనా జంటలు పిల్లలను కనడానికి ఆసక్తి చూపించడం లేదు. మరోవైపు చైనాలో వయసు మీద పడిన వారి సంఖ్య పెరుగుతోంది. ఇది ఆ దేశ ప్రభుత్వానికి ఆందోళన కలిగిస్తోంది.
భారత్‌లో చివరిసారిగా 2011లో జనగణన చేపట్టారు. 2021లో జన గణన చేపట్టాల్సి ఉన్నప్పటికీ కోవిడ్-19 కారణంగా ఆలస్యమైంది. దీంతో భారత్ సరిగ్గా ఏ రోజున చైనాను దాటేసిందనే విషయాన్ని చెప్పలేమని ఐక్యరాజ్య సమితి అధికారులు చెబుతున్నారు. ప్రపంచ వ్యాప్తంగా 804.5 కోట్ల మంది నివసిస్తుండగా.. అందులో మూడొంతుల జనాభా ఈ రెండు దేశాల్లోనే నివసిస్తుండటం గమనార్హం. గత ఆరు దశాబ్దాల్లో తొలిసారిగా గత ఏడాది చైనా జనాభా తగ్గింది. 2022లో చైనాలో నమోదైన జననాల కంటే మరణాల సంఖ్య ఎక్కువ.
మరోవైపు భారత జనాభా వృద్ధి రేటు కూడా నెమ్మదిస్తోంది. 2011కు ముందు దశాబ్దంలో మనదేశంలో జనాభా పెరుగుదల రేటు 1.7 శాతం ఉండగా.. తర్వాత అది 1.2 శాతానికి తగ్గింది. యునైటెడ్ నేషన్స్ పాపులేషన్ ఫండ్ (యూఎన్‌ఎఫ్‌పీఏ) డేటా ప్రకారం భారత జనాభాలో 25 శాతం మంది 14 ఏళ్ల లోపు పిల్లలు ఉండగా.. 18 శాతం మంది 10 నుంచి 19 ఏళ్ల మధ్య వయసున్న వారు ఉన్నారు. 10-24 మధ్య వయసున్న వారు 26 శాతం మంది ఉన్నారు. 15 ఏళ్ల నుంచి 64 ఏళ్లలోపువారు 68 శాతం మంది ఉండగా.. 65 ఏళ్లు పైబడిన వారు 7 శాతం మంది ఉన్నారు.
ప్రపంచంలోనే అత్యధిక జనాభా గల దేశంగా భారత్ నిలవడం పట్ల చైనా విదేశాంగ శాఖ మంత్రి వాంగ్ వెన్‌బిన్ స్పందించిన తీరు మన దేశం పట్ల వారికున్న అక్కసును బయటపెట్టేలా ఉంది. జనాభా ఎంత ఎక్కువ అనేదాని కంటే ఎంత నాణ్యమైన జనాభా ఉందనేదే ముఖ్యమన్నారు. జనాభా ముఖ్యమే గానీ.. టాలెంట్ కూడా ముఖ్యమేనన్నారు. తమ దేశంలో ఇప్పటికీ 90 కోట్ల మంది పని చేసే ప్రజలు ఉన్నారని.. తమ దేశాభివృద్ధి కోసం వారు ఇతోధికంగా శ్రమిస్తున్నారని వాంగ్ చెప్పుకొచ్చారు. ప్రపంచంలో రెండో అతిపెద్ద ఆర్థిక వ్యవస్థగా చైనా ఉన్న విషయాన్ని ఆయన గుర్తు చేశారు. ‘చైనాలో దాదాపు 90 కోట్ల మంది పని చేసే వారుండగా.. ఏటా కోటిన్నర మంది కొత్తగా శ్రామిక వర్గంలో చేరుతున్నారు. చైనాలో 24 కోట్ల మందికిపైగా ఉన్నత విద్యను పూర్తి చేశారు. ప్రస్తుతం శ్రామిక వర్గంలో చేరుతున్న వారు సగటున 14 ఏళ్లు చదువుతున్నార’ని చైనా ప్రీమియర్ లీ కియాంగ్ తెలిపారు.
2022లో చైనా జనాభా 8 లక్షల 50 వేలు తగ్గింది. చైనా జనాభా పెరుగుదల రేటు మైనస్ 0.6 శాతంగా నమోదైందని నేషనల్ బ్యూరో ఆఫ్ స్టాటిస్టిక్స్ ఈ ఏడాది జనవరిలో ప్రకటించింది. నేషనల్ హెల్త్ కమిషన్ వెల్లడించిన వివరాల ప్రకారం 2020 నాటికి చైనాలో 60 ఏళ్లు దాటిన జనాభా 26.4 కోట్లుగా ఉంది. ఈ రెండు మూడేళ్లలో ఇది మరింత పెరిగే అవకాశం ఉంది. 2035 నాటికి చైనాలో 40 కోట్ల మంది వృద్ధులు ఉండనున్నారు. ఇది అప్పటి చైనా జనాభాలో 30 శాతం ఉండనుండటం ఆ దేశ పాలకులకు ఆందోళన కలిగిస్తోంది. వృద్ధుల సంఖ్య పెరిగే కొద్దీ పని చేసే వారి సంఖ్య తగ్గడంతోపాటు వయసు మీద పడిన వారి ఆరోగ్యం కోసం ప్రభుత్వం చేసే ఖర్చు పెరుగుతుంది. 2021లో మన దేశంలో వృద్ధుల సంఖ్య 13.8 కోట్లు కాగా.. 2030 నాటికి అది దాదాపు 20 కోట్లకు చేరుకుంటుంది.
జనాభా నియంత్రణ కోసం ‘ఒక్కరే ముద్దు’ అంటూ.. దశాబ్దాలపాటు వన్ చైల్డ్ పాలసీని అమలు చేయడమే చైనాలో జనాభా పెరుగుదల తిరోగమనంలోకి వెళ్లడానికి దారి తీసింది. 2016లోనే బీజింగ్ ఈ పాలసీని ఎత్తేసినప్పటికీ.. ఆశించిన స్థాయిలో మార్పు కనిపించడం లేదు. కొత్త పాలసీ ప్రకారం చైనీస్ జంట ముగ్గురు పిల్లలను కనొచ్చు. ఇద్దరు లేదా ముగ్గురు పిల్లలను కన్నవారికి చైనాలో ప్రోత్సాహకాలు, సబ్సిడీలు ఇస్తున్నారు. కానీ మారిన ఆర్థిక పరిస్థితుల నేపథ్యంలో ఒక్కరిని కనడానికి కూడా చైనీయులు ఆసక్తి చూపడం లేదు. చైనాలో గత ఏడాది 9 కోట్ల 56 లక్షల మంది చిన్నారులు జన్మించగా.. 2021లో అది 10 కోట్ల 62 లక్షలుగా ఉంది. చైనా బర్త్ రేట్ 2021లో 7.52 శాతంగా ఉండగా.. 2022 నాటికి అది 6.77 శాతానికి తగ్గింది. 2022లో చైనా జనాభా తగ్గగా.. ఇకపై ఇదే ట్రెండ్ కొనసాగనుంది.
2050 నాటికి భారత జనాభా 167 కోట్లకు చేరనుండగా.. అదే సమయంలో చైనా జనాభా 132 కోట్లకు తగ్గుతుంది. జనాభా వేగంగా పెరగడం వల్ల ఆకలి, పేదరికం, నిరుద్యోగం లాంటి సవాళ్లను ఏ దేశమైనా ఎదుర్కోవాల్సిందే. ప్రజలకు సరైన వైద్యం అందడం, నాణ్యమైన విద్య అందించడం కష్టం అవుతుందనేది నిపుణుల మాట. అదే సమయంలో పని చేసే జనాభా ఎక్కువగా ఉండటం దేశ ప్రగతికి ఊతంలా పని చేయనుంది. మన దేశంలో 55 శాతం మంది 30 ఏళ్ల లోపు వారే కావడం గమనార్హం. వీరంతా పని చేసే ఏజ్‌ గ్రూప్‌కి చెందిన వారే. యువ జనాభాను, వనరులను సక్రమంగా ఉపయోగించుకుంటే భారత జీడీపీ ప్రస్తుతమున్న 3.5 ట్రిలియన్ల నుంచి 2030 నాటికి 9 ట్రిలియన్లకు, 2047 నాటికి 40 ట్రిలియన్లకు చేరుకోవాలనే లక్ష్యం నెరవేరడం పెద్ద కష్టమేం కాదు. మేథో వలసకు అడ్డుకట్ట వేయడం, సంపన్నులు దేశం విడిచి వెళ్లకుండా చూడటం లాంటి సవాళ్లను కూడ భారత్ అధిగమించాల్సి ఉంటుంది.
