శత్రు దుర్బేధ్యంగా ఉండే.. రష్యా అధ్యక్షుడి అధికారిక నివాసంపై డ్రోన్ల దాడి జరిగింది. ప్రస్తుతం ఈ ఘటన ప్రపంచ వ్యాప్తంగా హాట్ టాపిక్‌గా మారింది. రాత్రి సమయంలో.. రెండు డ్రోన్లతో దాడి చేసి.. రష్యా అధ్యక్షుడు వ్లాదిమిర్ పుతిన్‌ను చంపేందుకు.. ఉక్రెయిన్ ప్రయత్నించిందని రష్యా ఆరోపిస్తోంది మరోవైపు. క్రెమ్లిన్‌పై డ్రోన్ దాడికి సంబంధించిన వీడియో ఇప్పుడు సోషల్ మీడియాలో వైరల్‌గా మారింది.
'క్రెమ్లిన్ భవనంపై రెండు ఉక్రేనియన్ డ్రోన్‌లు రాత్రిపూట దాడి చేశాయి. రష్యా అధ్యక్ష నివాసం క్రెమ్లిన్లో ఎలాంటి భౌతిక నష్టం జరగకుండా.. సైన్యం రెండు డ్రోన్‌లను కూల్చివేసింది' అని రష్యా అధికారులు వెల్లడించారు. ఉక్రెయిన్ చేసిన డ్రోన్ దాడి.. ఉగ్రవాద దాడి అని.. అధ్యక్షుడు పుతిన్ హత్యకు జరిగిన ప్రయత్నమని మాస్కో ఆరోపిస్తోంది.
క్రెమ్లిన్ కాంప్లెక్స్ భూభాగంలో డ్రోన్ల శకలాలు చెల్లాచెదురుగా ఉన్నాయని.. ఎటువంటి ప్రాణనష్టం, భౌతిక నష్టం జరగలేదని రష్యా అధ్యక్ష పరిపాలన నుంచి ప్రకటన వచ్చింది. డ్రోన్ దాడి జరిగిన సమయంలో పుతిన్ క్రెమ్లిన్లో లేరని.. మాస్కో వెలుపల ఉన్న తన నోవో ఒగారియోవో నివాసంలో పనిచేస్తున్నారని వెల్లడించింది. రష్యా ఆరోపణలపై ఉక్రెయిన్ అధ్యక్షుడి సలహాదారు స్పందించారు. ఈ దాడితో తమకేం సంబంధం లేదని స్పష్టం చేశారు.
